1 Raja-raja 2
Iatonna la madomi’mo nalambi’ lampakna tu Daud, napasanmi lako Salomo, anakna, nakua:
La malemo’ unnola lalanna mintu’ issinna lino, iamoto la batta’ko sia la tenko misa’ muane.
Sia pogau’i tu mintu’ Natuntunna PUANG, Kapenombammu: iamotu unturu’ lalanNa sia ungkaritutui mintu’ apa Napondok sia pepasanNa sia atoranNa sia pangadaranNa, susitu mintu’ apa disura’ lan sukaran alukna Musa, ammu palolang marampa’i tu mintu’ apa mupogau’ sia mintu’ apa mukarang.
Anna palanda’i PUANG tu pangallu’ tu mangka Napokada diona aku kumua: Iake nakaritutui meloi anakmu tu mai lalanna sia lolang maruru’ dio oloKu sia lantuk tu penaanna sia kalebu deatanna, manassa moi misa’ bati’mu tang la ka’tu unnisungi isungan kapayunganna Israel.
Muissan dukai tu apa nagauranna’ Yoab, anakna Zeruya, iamotu apa nagauran da’dua pangulu rari to Israel, diona Abner, anakna Ner na Amasa, anakna Yeter, tu umba napakuanni umpatei sia napatibollo tu rarana susito lan tananan ra’, moi anna attu kasitaman, natombangmi rara iato tu salipi’na lan aakna sia sepatunna lan lentekna.
La lolang kinaako, da mueloranni tu ubanna male marampa’ rokko lino to mate.
Apa iatu mai anakna Barzilai to Gilead, la mutiroan kameloan, sia la sangisungangko sola kumande tu tau iato mai, belanna susito tu tau iato mai tonna sae umpessitammuina’, tongku mallai dio mai kakammu Absalom.
Den siapa dio kalemu tu Simei, anakna Gera, to Benyamin dio mai Bahurim, tu untampakkina’ ropu tampak ropu mapassik tongan, tongku male lako Mahanaim; apa undinna to saemi lako randan salu Yordan untammuina’; iamoto angku palao sumpa lako kalena tete dio PUANG, kumua tae’ kula umpateiko pa’dang.
Apa totemo da mueloranni tu salana tang diukung belanna misa’ko to kinaa; manassa muissan tu apa sipatu la mugauranni, kumua ammu parokkoi lino to mate tu ubanna sitombang rara.
Malemi tu Daud tama batu dilobang sola nene’ to dolona, anna dipeliang lan kotana Daud.
Iatu Daud patangpulo taunna undatui to Israel; pitungtaun ma’parenta dio Hebron, anna tallungpulo ntallung taun dio Yerusalem.
Unnisungmi tu Salomo dao isungan kapayunganna Daud, ambe’na, anna dipabantang tongan tu kadatuanna.
Saemi tu Adonia, anakna Hagit, mennolo lako Batsyeba, indo’na Salomo; mekutanami tu Batsyeba, nakua: Lantuk siaraka tu kasaeammu? Mebalimi nakua: Io, lantuk sia.
Mangkato, ma’kadami nakua: Den sangbuku kada la kuparampo lako kalemi. Mebalimi tu Batsyeba nakua: Pokadami.
Nakuami: Miissan duka, kumua iatu kadatuan inang taaku sia pada nasangamo tu mintu’ to Israel kumua akumo la datu, anna membali kataananna adingku, belanna PUANGmo umpapatui.
Totemo misa’ri tu apa kupalaku lako kalemi, da mitang umpasiolai. Mebalimi tu Batsyeba nakua: Pokadami.
Ma’kadami nakua: Pokadanni datu Salomo – belanna tae’ anna tang umpasiolai tu palakummi – anna benna’ tu Abisag, to Sunem, kupobainei.
Mebalimi tu Batsyeba nakua: Melomi; kupokadammira datu tu palakummu.
Saemi tu Batsyeba lako datu Salomo la umparampoi lako datu tu diona apa napokada Adonia. Ke’de’mi tu datu la umpessitammui indo’na, anna tukku lako; unno’ko’mi tu datu dao isungan kapayunganna, anna mesua umbanni isungan tu indo’ kadatuan, anna unnisung dio kananna datu.
Ma’kadami nakua: Den kutungkanan lako kalemi apa bitti’ bangsia, da mitang umpasiolai te palakungku. Nakuami tu datu lako: Palakumi, indo’, tae’ angku la umpasisalai tu palakummi.
Nakuami tu Batsyeba: La miben Adonia, kakammi, napobainei tu Abisag, to Sunem.
Mebalimi tu datu Salomo lako indo’na, nakua: Ma’apai anna Abisag manna, to Sunem, mipalakuan Adonia? Palakuan tarru’i te kadatuan, belanna kakangku, sia la ia la to minaa Abyatar la Yoab, anakna Zeruya.
Umpalaomi sumpa tu datu tete dio PUANG, nakua: Nasanggangimora’ Puang Matua sia la Narangnganni pole’pa, ke tae’i na kadanna kalena Adonia untumang sunga’na.
La lelukraka tuoNa PUANG, tu untokkona’ sia umpannisungna’ dao kapayunganna ambe’ku Daud, sia ungkamaseanna’ bati’ lan tongkonan layuk, susitu Naallu’, ke tae’i nadipatei bangsiamo tu Adonia allo iate.
Nasuami datu tu Benaya, anakna Yoyada, umba’tai anna mate.
Nakuami tu datu lako to minaa Abyatar: Maleko lako Anatot, lako to’ bela’mu, belanna to sipatu dukako la dipatei, apa tae’ kula umpateiko totemo, belanna iko tu umbulle pattinNa Puangta PUANG dio olona ambe’ku Daud sia belanna pada muperasai ambe’ku tu mintu’ kamaparrisan.
Natassu’imi Salomo tu Abyatar, kumua damo anna dadi to minaanNa PUANG; susimoto nanii umpalanda’i tu kadanNa PUANG, tu Napokada dolomo Puang diona bati’na Eli dio Silo.
Iatonna rampomo tu kareba iato lako Yoab – belanna iatu Yoab ma’mirringan lako Adonia, moi anna dolona tae’ anna ma’mirringan lako Absalom – mallaimi tu Yoab lu tama tendaNa PUANG, natoei tu tanduk inan pemalaran.
Napokadami tau lako datu Salomo kumua iatu Yoab mallai tama tendaNa PUANG, nabendan dio sa’de inan pemalaran. Nasuami Salomo tu Benaya, anakna Yoyada, nakua: Maleko ammu ba’tai.
Malemi tu Benaya tama to’ tendaNa PUANG, nama’kada lako Yoab nakua: Nakua kadanna datu: Tassu’ko. Mebalimi nakua: Tae’, la’bi’ mate indena’ te. Naparampomi Benaya tu kada iate lako datu, nakua: Susite tu kadanna Yoab sia susimote tu nabalianna’.
Nakuammi datu: Pogau’mi susitu kadanna, ba’tai ammu lamunni, ammu sapui dio mai kaleku sia dio mai tongkonan layukna ambe’ku tu rara to tang sala tu napatibollo Yoab.
La Napasulean PUANG tu rarana dao botto ulunna, belanna mangka umba’ta sia umpatei pa’dang tu da’dua to malambu’ sia melo anna ia, tu tang naissan ambe’ku Daud, iamotu Abner, anakna Ner, pangulu rarinna to Israel sia Amasa, anakna Yeter, pangulu rarinna to Yehuda.
Susimoto tu rarana tau sola duai la dipasulean langngan botto ulunna Yoab sia langngan ulunna mintu’ lanto mimi’na sae lakona, apa iatu Daud sola mintu’ lanto mimi’na sia to lan banuanna sia isungan kapayunganna la unnappa’ kamarampasan dio mai PUANG tontong sae lakona.
Malemi langngan tu Benaya, anakna Yoyada, anna ba’tai namate, nalamunni tau dio to’ banuanna dio padang pangallaran.
Naangka’mi datu tu Benaya, anakna Yoyada, dadi kamandang lompo ussonda Yoab, anna to minaa Zadok ussonda Abyatar.
Mangkato mesuami tu datu umpopetambai Simei, anna kuanni kumua: Garagangko kalemu misa’ banua dio Yerusalem, ammu nii; da mutassu’ len lan mai la male umba-umba nii.
La muissan melo, kumua iake tassu’ lenko, ammu lamban salu Kidron, manassa la mateko dipongko na iatu raramu iko kalena urrengnge’i.
Mebalimi tu Simei lako datu nakua: Tonganna te kadammi; mintu’ kadammi la kududung. Torromi ba’tu pirang-pirang allo tu Simei dio Yerusalem.
Apa iatonna upu’mo tallungtaun, pakalan mallaimi tu da’dua kaunanna Simei lako Akhis, anakna Maakha, datu Gat; napokadami tau lako Simei nakua: Iatu kaunammi sola duai dio sia tondok Gat.
Ke’de’mi tu Simei, anna suai tu tau ullapikki keledainna, namale lako Gat umpessitiroi Akhis, la undaka’ kaunanna. Malemi dio mai tu Simei, anna solanni tu kaunanna dio mai Gat.
Napokadami tau lako Salomo kumua iatu Simei sunmo lan mai Yerusalem male lako Gat, anna sule dio mai.
Mesuami datu untambai Simei, nama’kada tu datu lako nakua: Tang kusumparokoka tete dio PUANG sia kupakulu-kulu tonganko kumua: Ia bangsiato allo munii sun dio mai male umba-umba nii, la muissan kumua manassa la mate dipongkoko? Mukuami lako kaleku: Tonganna te kadammi, la kududung.
Iamoto ma’apai anna tae’ ammu karitutui tu sumpa tete dio PUANG sia pepasan mangka kupadudungangko?
Sia nakuapa tu datu lako Simei: Muissan duka sia tu mintu’ kakadakean – lan duka sia penaammu – tu mugauran ambe’ku Daud; totemo la Napasule PUANG langngan ulummu tu mintu’ kakadakeammu.
Apa na maupa’mora tu datu Salomo sia iatu isungan kapayunganna Daud la bantang tontong sae lakona dio oloNa PUANG.
Nasuami datu tu Benaya, anakna Yoyada, anna male umba’tai tu Simei, naurunganni mate. Dipabantangmi tu kadatuan tete dio limanna Salomo.